Ciao Lidia… Ciao Felice… Mo in do corrot cha tsi tutt’agitäda?
Eh… nal sät miga? A vagh al Bellé, a San Pancrasi.
Eh… E co’ succeda che tutta la genta la corra là?
A gh’è il partidi äd slopìcc, a gh’è al bezbol, a zuga di ragass e dil ragassenni e anca di grand… is divartisson cmé di matt.
E in do restol?
A t’o ditt a San Pancrasi, dopä la rotonda, zò vers Valera. Mo s’at ghè migä la machina at ghe po’ndär in aftobus… però al numor a nal so migä…
Beh, mo l’è listess, incò a fagh un gir e vagh a vedor…
Am venna in menta na bela poezia, cla n’è migä äd Pezzani mo la va bèn listess… L’è in dialètt …
A gh’ mancariss ätor ch’la fiss in italiàn!
Mo l’è pràn bell al nostor dialètt, l’è na muzica, l’è belisim anca quand al n’è migä in rimma: sa tal lez da razòn l’è cme sintir n’aria äd Verdi.
Costa l’è preciza pri nostr’amigh dal slopìcc, che iarsira i gh’l’an caväda a vensor na partidä.
Sì, e po’ i m’an ditt che al Mecio l’a fatt n’ezibisiòn prima chi comincisson a zugär e l’a strabuccä na bala dardè ala ramäda…
L’è vera, e po’ at sarè pu’ chi gh’era in camp!
No, chi gh’era?
Al Gàlo!
Dabòn? L’è propia vera che al virus dal bezbol quand a tal ciapp al ne va via gnàn coil strolgaduri!

L’era ora ad lässer lì
con dil ciac’ri e gnenta äd pu’.
Chi ragass i ghevon voja
äd zugär int al diamant

Ciacla e ciacla la va bèn
quand d’inveron an gh’è srén
e la neva con la giasa
it fan migä andär in piasa

Mo quand riva ormäi avril
e gh’è sutt int al cortil,
damm a drè la mé canela
‘c’gh’o bizogna ‘d färla bela:

gh’o da còror finna in primma,
cme na levra andärgh in simma!
Mama, damm a drè du franch
che po’ dopa a magn al camp.

Gh’è un bel sit pién ‘d bei ragass
strajé là cme i fisson strass;
mo sa t’ja vedd pu’ da zvén,
mama mia me jen carén!

Im fann gnir in menta ancora
quand a ser’n in temp äd guera,
i me dzevon “corra, corra!”
e mi’l fäva acsì lontera.

L’era al zogh di ‘mericàn,
un lavor mäi vist chicsì
ch’al riväva da lontàn…
A gh zugariss tutt i dì!

Però ‘s tocca lavorär
e tirer su soquant fjò,
contintemoss äd drovär
la balenna col guantòn

du o tri dì o do volti al mez,
tant da tgniross un po’ vist.
Semma in sett o ott… o dez?
Arduzimma al camp bell pist.

Po’ dmatenna quand s’alvemma
n’ätor inning zugaremma.
Mo che bela malatia,
piccia fort e corra via!