Ani lusträ il caneli chi ragass? A’m sa ‘d no. Quand j’emma vist zugär la smana indrè i parevon di bej soldatèn mo gh’era quel cha struzäva. J’emmä capì co l’era venerdì intant ch’jeron a drè battor contr’al Säla: il caneli i n’eron miga lustri. Chi ragass i parevon un po’ di bersaglier col s’ciopp imporent. E sì cha ‘n s’è alvè gnanca un boff d’aria, quäzi a ciamär i sensoss a ciucciär un po’ äd sangov fresch; parchè al saì che sa tira al vent al stuard la porenna rossä la blizga dapartutt e la ‘s va a intraussäross infinnä int’i mudant. Ogni modo anca con dil massi frusti e smaccädi ian portä a ca’ na bela partida. Sì, a issor sincer soquanti intartajädi i gh’jan vudi, c’me quand al nostor checcer inveci dal guantòn al pareva ch’al gh’iss na savonettä e pu’ che ciapär la balenna al balottäva di grattòn äd tera rossä, là in znociòn. Dzigh “veh che i begh pr’andär a pescär is caton soquant metor dardè la ramäda, int al camp di mlòn, cl’è sempor bagn moj e bel tènor”. Da nuätor anca se Nello al seguita a dacquärogh agh resta sutt ‘me na bräsca. Però povrètt, bizògna capir anca che vers la fèn dla partida la fama la taca a rozgär e ‘s taca sempor a vedrogh dopij. Speremmä che lundì sira quen a vena al Fazo, sionò s’toccrà tribulär par fnir… la pastasuttä dla Kuzza.