Beh, mo'n sarì migä ancora drè pensär che 'l balòn l'è acsì bell, ahn? O-sìa... par me cont l'è belisim catärs int un prè e där do zbarädi ala bala, ridor in compania e magari cassär zò un scalfarôt äd vén bianch tutt insemma dopa issors tirä via la lidga. Mo' quand la cozä la pära gnir importanta bombén ecco cha sälta fora i brutt vissi e il stupidädi e alora am divartiss pù: iv miga vist co j'ani fat a Gennva soquant siocarlòn damezä d'j ultras? Mo po', sensa 'ndär a tirär a màn il nassionäli e la serie a, provì a 'ndär a guardär na partida'd ragassôt: a 's vedda dil mami e d'j ommin chi 's dizon di lavor da càn. Se po' i tgnù da ment ai giornäl, arì vist infinna che l'an passä a na partida 'd putén i s'en infinna dä, e j'al ciamävon al torneo dal ferplèi... mo va par merdi co' un fil d'zingol, par piäzer!!! Chi, sa vremma gnir su co'un po'd bargnocla e giudissi bizognä lassär lì äd stär tropp a drè al balòn. Zughì a quel ätor, cl'è tuta salute: a gh'n'in sarà, no? Al rugby, al zogh dil boci, al pingpong, la biciclettä, al conchèn, la pataja e rampär su e zò par l'ärzon intant cha corrä anca al tò càn... E po', sa vrì godor, mettiv su du bragòn, na camiza bondanta, tolì su un canlètt, na balenna e 'n guantòn e gnì chicsì cha'v femma capir co l'è 'l zogh äd la vitä! Arvedross a st'an q'ven!